មានពាក្យជាច្រើន ដែលចង់និយាយទៅកាន់បុរសម្នាក់ដែលខ្ញុំធ្លាប់ស្រឡាញ់

2021-06-30 07:58:31
ចំនួនមតិ 0 | ចំនួនចែករំលែក 0

ចន្លោះមិនឃើញ

បែកគ្នាជារឿងមួយដែលខ្ញុំខ្លាចបំផុត ហើយមិនចង់មាននៅក្នុងឆាកជីវិតម្ដងហើយម្ដងទៀតនោះទេ ប៉ុន្តែវានៅតែរត់មករកខ្ញុំដដែល។

[…] ចាប់តាំងពីខ្ញុំដាក់ចិត្តស្រឡាញ់គាត់ ខ្ញុំចាប់ផ្ដើមលែងមានអារម្មណ៍ជាមនុស្សប្រុសផ្សេងទាំងអស់ ពេលវេលាដែលសេសសល់របស់ខ្ញុំគឺនៅលើគាត់ទាំងអស់ ទោះបីជាពេលខ្លះត្រូវទៅអង្គុយចាំគាត់ក៏ខ្ញុំមិនដែលថាឡើយ។ ត្រូវហើយពីមុនខ្ញុំគ្រាន់តែជាក្មេងស្រីម្នាក់ដែលចេះតែស្រឡាញ់គេស្មោះ ហើយមិនចង់ផ្លាស់ប្ដូរស្នេហា មិនទាន់មានការងារ ហើយខ្ញុំក៏មិនមែនជាកូនអ្នកមានទៀត ដូច្នេះពេលដែលខ្ញុំចង់ទិញអ្វីឲ្យគាត់គឺត្រូវសន្សំ ប៉ុន្តែវាហាក់ដូចជាគ្មានតម្លៃសោះសម្រាប់គាត់ ហើយរឹតតែធ្វើឲ្យខ្ញុំមានអារម្មណ៍ហត់នឿយដែលត្រូវតាមយកចិត្តទុកដាក់ តាមស្រឡាញ់គាត់តែឯង។ ភាពសោះអង្គើយរបស់គាត់កាន់តែធ្វើឲ្យខ្ញុំឆ្អែតបន្តិចម្ដងៗព្រោះរយៈពេលជិត ៤ ឆ្នាំហើយដែលខ្ញុំមិនដែលទទួលបានភាពកក់ក្ដៅ និងសុភមង្គលដូចមនុស្សស្រីដទៃទៀត។

[…] សួរថាគាត់ជាមនុស្សល្អទេ? គាត់មិនអាក្រក់នោះទេ គាត់ល្អ គាត់ស្រឡាញ់ខ្ញុំ ហើយព្យាយាមដើម្បីខ្ញុំមិនតិចដែរ ប៉ុន្តែវាគ្រាន់តែជាពេលវេលាដំបូងដែលគាត់ស្រឡាញ់ខ្ញុំតែប៉ុណ្ណោះ។ ពេលនេះគាត់មិនមែនជាមនុស្សប្រុសដែលខ្ញុំស្គាល់ កាលពីមុនឡើយ។

គាត់តែងតែស្រែកគំហកឲ្យខ្ញុំពេលដែលគាត់មិនសប្បាយចិត្ត គាត់តែងតែមិននិយាយរកខ្ញុំពេលដែលគាត់ទាស់ចិត្តរឿងអ្វីមួយ ពេលដែលឈ្លោះគ្នាគាត់មិនដែលលួងលោម និងសុំទោសខ្ញុំឡើយទោះបីជាពេលខ្លះគាត់ខុសហើយឃើញខ្ញុំពិបាកចិត្តក៏ដោយ ហើយពេលខ្លះគាត់ថែមទាំងហាមាត់សុំខ្ញុំបែកគ្នាទៀតផង។ គាត់មិនដែលទុកខ្ញុំជាមនុស្សមានតម្លៃ និងខ្លាចបាត់បង់ខ្ញុំនោះទេ ប្រហែលជាគាត់គិតថាខ្ញុំដូចជាឆ្កែមួយក្បាលដែលចាំតែឲ្យសាច់វាស៊ី វានៅតែស្រឡាញ់ម្ចាស់ដដែល។ តែសុំទោសផងខ្ញុំមិនមែនជាវានោះទេ ដែលគ្រាន់តែនិយាយថាស្រឡាញ់មួយមាត់គ្រប់គ្រាន់ចំពោះស្នេហានោះ។

រូបតំណាង

គួរឲ្យអស់សំណើចណាស់មែនទេដែលខ្ញុំសុខចិត្តធ្វើជាអ្នកចាញ់ ធ្វើជាអ្នកសុំទោស និងលួងគាត់ អស់ពេលយូរយ៉ាងនេះ ប៉ុន្តែអំពើល្អដែលខ្ញុំធ្វើ និងការអត់ធ្មត់ដែលខ្ញុំមាន វាគ្មានន័យចំពោះគាត់ទាល់តែសោះ។ គាត់ទុកខ្ញុំចោល ដូចខ្ញុំជាមនុស្សដែលគ្មានសង្សារអីចឹង មានគាត់ក៏ដូចគ្មានគាត់ ហើយស្រឡាញ់គាត់គឺខ្ញុំមានតែការឈឺចិត្តតែប៉ុណ្ណោះ។ ភាពផ្អែមល្ហែមវាតិចតួច ជាងភាពជូរចត់ ហើយទឹកភ្នែកដែលខ្ញុំស្រក់ក៏វាច្រើនជាងស្នាមញញឹមដែលខ្ញុំមានដែរ។ គ្រប់ពេលមានតែរឿងឈ្លោះគ្នា មិនចុះសម្រុងគ្នា ហើយខ្ញុំពិតជាមិនដឹងថាគាត់ទុកខ្ញុំជាអ្វីឲ្យប្រាកដនោះទេ ពេលដែលគាត់ត្រូវការខ្ញុំគាត់ហៅខ្ញុំ គាត់មករកខ្ញុំ តែពេលដែលគាត់មិនត្រូវការខ្ញុំគឺមិនចង់ជួប។

[…] វាល្មមដល់ពេលដែលខ្ញុំដើរចេញហើយ!

ត្រូវហើយខ្ញុំមានអារម្មណ៍ថាស្ដាយពេលវេលាណាស់ ព្រោះខ្ញុំបានចំណាយពេលអស់ជិត ៤ ឆ្នាំជាមួយមនុស្សម្នាក់ដែលថា ស្រឡាញ់ខ្ញុំបានត្រឹមតែនិយាយ ប៉ុន្តែមិនដែលធ្វើនោះ ហើយរឹតតែស្ដាយដែលខ្ញុំខំដាក់ចិត្ត និងបដិសេធមនុស្សប្រុសជាច្រើនដើម្បីគាត់ម្នាក់។

បែកគ្នាហើយតើខ្ញុំសប្បាយចិត្តទេ? អាចនិយាយបានថា មិនសប្បាយចិត្តនោះទេ ព្រោះភ្លាមៗខ្ញុំត្រូវអង្គុយយំ ដេកយំ និងឈរយំដូចជាមនុស្សឆ្កួតអីចឹង ប៉ុន្តែយ៉ាងណាក៏ខ្ញុំមិនមានអារម្មណ៍ឈឺចាប់ដូចពេលដែលខ្ញុំមានគាត់។ ពេលវេលាពិតជាដើរលឿនណាស់ ពួកយើងបែកគ្នាជិតមួយឆ្នាំទៅហើយ ប៉ុន្តែខ្ញុំនៅតែមិនភ្លេចគាត់ តែមិនមែនមានន័យថាខ្ញុំនៅស្រឡាញ់គាត់នោះទេ គឺព្រោះតែខ្ញុំនៅមានអារម្មណ៍ថាខ្លាចអ្វីដែលគាត់បានផ្ដល់ឲ្យខ្ញុំ។ ឥលូវនេះខ្ញុំឈប់យំហើយ ផ្លូវចិត្តខ្ញុំក៏ធូរស្រាលដែរ ប៉ុន្តែខ្ញុំនៅតែខ្លាចគាត់ និងមិនចង់សូម្បីតែចង់ឲ្យគាត់ត្រឡប់ ព្រោះពេលនេះខ្ញុំមិនមែនជាមនុស្សដែលគាត់អាចហៅក៏ហៅបាននោះឡើយ។

រូបតំណាង

«សុខសប្បាយទេ?» ជាសំណួរដែលខ្ញុំចង់សួរទៅគាត់ព្រោះខានជួបគ្នាយូរហើយ។

«ពេលគ្មានខ្ញុំយ៉ាងម៉េចដែរ? អាចរកបានមនុស្សស្រីដែលស្រឡាញ់អ្នកជាងខ្ញុំឬនៅ? »

«ត្រូវហើយបើរកបានត្រូវស្រឡាញ់គេឲ្យខ្លាំងជាងខ្ញុំផង ព្រោះខ្ញុំគិតថាគ្មានមនុស្សស្រីណាអាចទ្រាំបានដូចខ្ញុំឡើយ។»

«ពេលនេះខ្ញុំសុខសប្បាយណាស់ រៀនក៏ល្អ ថែមទាំងមានការងារដែលខ្ញុំស្រឡាញ់ទៀតផង។»

«ខ្ញុំពេលនេះមិនដូចមុនទេ ខ្ញុំស្រឡាញ់ភាពឯកាដែលខ្ញុំមានណាស់។ អូហ៍! មែនហើយ នៅមានរឿងមួយទៀត ការពិតក៏មានមនុស្សតាមស្រឡាញ់ខ្ញុំដែរ ប៉ុន្តែខ្ញុំមិនទាន់ចង់បាន។»

«អរគុណហើយដែលដោះលែងខ្ញុំឲ្យមានសេរីភាព និងរកផ្លូវមួយដែលល្អជាងពេលដែលខ្ញុំនៅជាមួយអ្នក ទោះឯកាបន្តិចតែខ្ញុំមានភាពរីករាយច្រើនជាងមុនឆ្ងាយណាស់។»

«ថែខ្លួនផងណាសង្សារចាស់។ » ពីខ្ញុំ មនុស្សដែលធ្លាប់ស្រឡាញ់អ្នកខ្លាំង។

ផ្ដល់សាច់រឿងដោយ ៖ រចនា ខេត្តកណ្ដាល

អត្ថបទ៖ ផលធិតា